بالی ووڈ کے معروف اداکار ویویک اوبروئے کے خلاف ویلنٹائن ڈے کے موقع پر بغیر ماسک اور ہیلمٹ لگائے اہلیہ کے ہمراہ موٹرسائیکل چلانے پر ممبئی پولیس نے مقدمہ درج کرلیا۔
ویویک اوبروئے نے ویلنٹائن ڈے پر اپنے تصدیق شدہ انسٹاگرام اکاؤنٹ پر اپنی ایک ویڈیو شیئر کی تھی جس میں وہ اہلیہ کے ہمراہ ماسک اور ہیلمٹ پہنے بغیر ممبئی کی سڑکوں پر موٹر بائیک چلارہے تھے۔
بالی ووڈ اداکار کی یہ ویڈیو دیکھنے کے بعد انسٹاگرام صارفین نے اُن پر شدید تنقید کرتے ہوئے کہا کہ ویویک اوبروئے نے کورونا وائرس ایس او پیز کی خلاف ورزی کرتے ہوئے بھارتی عوام کو غلط پیغام دیا ہے لہٰذا ان کے خلاف سخت ایکشن لینا چاہیے۔
ویڈیو دیکھنے کے بعد ممبئی کے جوہو پولیس اسٹیشن میں ویویک اوبرائے کے خلاف کورونا ایس او پیز کی خلاف ورزی کرنے پر ایف آئی درج کی گئی ہے اور اُس کے ساتھ ہی ہیلمٹ نہ پہننے پر 500 روپے کا جرمانہ بھی عائد کیا گیا ہے۔
یاد رہے کہ بھارتی ریاست مہارشٹرا میں کورونا وائرس کے کیسز میں تیزی سے اضافہ ہو رہا ہے جس کہ وجہ سے مقامی پولیس ماسک نہ پہننے والوں کے خلاف سخت کارروائی کررہی ہے۔
