آل پاکستان پبلک ٹرانسپورٹ اونرز فیڈریشن کے صدر ملک ندیم حسین نے کہا ہے کہ کمپیوٹر کی خرابی کی وجہ سے کئی دنوں سے روٹ پرمٹ کا اجرا بند ہے۔
جیو نیوز سے گفتگو میں ملک ندیم حسین نے کہا کہ لاہور میں ٹریفک پولیس اور رنگ روڈ کی پولیس ناجائز جرمانے کررہی ہے۔
انہوں نے کہا کہ پبلک ٹرانسپورٹ کے لیے لاہور کے بتی چوک اور بابو صابو کے بس اسٹاپ تاحال بحال نہیں کیے گئے ہیں۔
ملک ندیم حسین نے مزید کہا کہ بادامی باغ جنرل بس اسٹینڈ میں صفائی کی صورت حال ناقص ہے، وہاں تھکے ہارے ڈرائیوروں کے لیے ریسٹ ہاؤس بھی نہیں ہے۔
ان کا کہنا تھا کہ کمشنر لاہور کی قائم کردہ کمیٹی کے اجلاس کے باوجود مسائل حل نہیں ہوئے ہیں۔
آل پاکستان پبلک ٹرانسپورٹ اونر فیڈریشن کے صدر نے یہ بھی کہا کہ مسائل حل نہ ہوئے تو پبلک ٹرانسپورٹ بند کرنے پر غور کرسکتے ہیں۔
